Siba we bixêr be gelî birana
Ya we tev de gelî pîr û ciwana
Li xwe miqate bin xwe biparêzin
Çile ye van demsalê zevestana
Xasma pîr û kalên li ser kopalan
Li ber sermayê em bûn wek tefalan
Ciwanî malê barkirye ji cem me
Meşa me jî bûye wek bi pîvanan
Lewra em î salxûrin pîr û kal in
Roja me çûye û em bê pergal in
Dema dimeşin li ser xwe digerin
Bi ax û ox bi kesera dinalin
Ax ew ciwanî carek din bihata
Me rewşa pîrbûnê jê re bigota
Ku îtiyarî çi bi meriv de tîne
Meriv dike ji sûk û ji civata
Hin kal û pîr henin tim li mal in
Êvzar in, hêjar in û bê pergal in
Xwedê semaxek zêde bide wanan
Ew girtiyê Xwedayê Zilcelal in
Digel her rewş û ehwal dîsa spas
Hemd û şikir dibêjim hem bê qiyas
Xwedê me bi tendrûstiyê ‘ezmûn neke
Lew hêz û mecala me tune hewqas
Gotinek heye, dibên îxtiyarî
Îxtiyarî hem hezar ‘eyb û ‘arî
Lew pergala jînewariyê ev e
Peywira me semax û spasdar î
